Happiness is .. السعادة هي

السلام عليكم ..

كيف الحال إن شاء الله طيبين ومبسوطين وبقمة سعادتكم يا رب ..

في موضوع مقرقع بقلبي له فترة ويمس كثير الحالة النفسية عند كل شخص فينا ..

ألا وهو تعريف السعادة عند الشخص ..

طبعًا الموضوع فلسفي شويتين  فلذلك الأفضل كل واحد يحضر الكافيين حقه ( قهوة/شأي) ..

Coffee and Book

Jeddah 13, January 2018

كل شخص له مفهومه الخاص بالنسبة للسعادة .. البعض يشوف السعادة بوجود أشخاص في حياته والبعض الآخر يشوفها في الماديات ..والبعض يشوفها بانه يتملك بيت العمر .. أو الحصول على وظيفة ..  والقائمة تطول  ..

من وجهة نظري أشوف أن السعادة  ممكن نلقاها في كل شيء.. يعني نحن اللي نصنع السعادة .. ما اقدر احصرها في شيء واحد أحس إني اظلمها ..

يعني مثلا ..

 أكون بقمة سعادتي يوم اصبح على يوسف وأشوف ابتسامته العريضة مرسومة على وجهه .. أو أكون مع زوجي سهرانين وفالينها محشات وسواليف واستهبال ..

أكون سعيدة يوم أسوي كوب قهوة وأقعد في ركني الخاص بكل هدوء وأقرالي كتاب ..

أو إني التقط صورة بكمرتي مثل ما كنت أتخيل..

أو أني اخرج وامشي على البحر ..

أصحى الصبح وأكون بعافيتي والحمد لله ..

أكيد طبعا السفر .. انا من عشاق السفر

أو،،

أو،،

أو،،

كثيرة هي اللحظات اللي نكون فيها سعيدين واحس حرام نحصر السعادة في المال أو وجود أشخاص معينين بحياتنا ..

حيث مؤخرًا لاحظت اكثر الناس كل همها المادة وبس .. صحيح المادة مهمة بس هم بعد في أشياء ثاني مهمة .. وأتوقع أن سبب شعورهم بهالشي ممكن لأنه/لأنها تتابع ناس على السوشيال ميديا مظهرين جزء بسيط من يومياتهم وودها/وده إنهم يعيشون بنفس وضعهم وما يدروا هذولي شنوا عندهم..

في النهاية بدون مثاليات..

استمتع بكل لحظة واخلق السعادة ولا تنتظر السعادة من أحد ..

سوي الشي اللي يخليك مبسوط وسعيد وبنفس الوقت خلك واقعي يعني مو تقول أن سعادتي مثلا بأن تشتري شيء فوق طاقتك المادية ..

حبة حبة ورح توصل للي تبيه .. يعني ما أقول لا تصير طموح بالعكس لكن بوضعك الحالي لا تكلف/تكلفي نفسك فوق طاقتها  ..

بالأخير هذا مو معناته ما رح نكون تعيسين وحزينين طول الوقت..  إلا ما تجي أوقات ما نقدر نتحكم بمشاعرنا  لكن لا تطول مرحلة الحزن والزعل .. نطلق العنان لمشاعرنا شوي من حزن وكئابة بس المهم انه لا تطول عشان لا تصير اغلب حياتنا على هذا المود ..

وبس ..

ويارب يكون الموضوع خفيف وما طولت عليكم كثير بالحكي ..

و أشوفكم على خير يا رب وكل حياتكم سعادة في سعادة ..

Follow: