Yousef Breakfast Style.. نظام فطور يوسف

Yousef Breakfast Style.. نظام فطور يوسف

 

أهلين مرة ثانية ..

إن شاء الله تكونوا طيبين ..

الأمومة نعمة من نعم الله ومسئولية بعد .. فلازم نحافظ عليها لأنه محاسبين عليها..

والله يبارك لكل أم ويرزق لكل من تتمنى ..

 كل بعد فترة يوسف ينهي فترة من مراحل عمره ويبتدي مرحلة جديدة وبالنسبة لي كأول مرة أكون أم فأنا قاعدة استكشف وأتعلم ..

Processed with VSCO with a5 preset

بصراحة .. في السابق يوم كنت أشوف اكل الأطفال كان جد ما يستهويني غير السيريلاك وكنت احب أكله حتى وانا كبيرة وبعدين الوضع تغير يوم بديت أشوف كيف الأطفال ومشاكلهم الصحية ..

طبعًا بديت اهتم من عرفت اني حامل بيوسف ..

أول شيء سويته قرأت كثير عن موضوع الطفل والعناية وشنو احتياجاتهم .. بعد ما قريت عن فوائد الرضاعة للطفل والأم بعد.. صممت أن أرضع يوسف طبيعي أكثر وقت ممكن .. وأتمنى إني أتم السنتين ..

و الحين بعد ما صار في مرحلة عمرية أنه لازم أدخل الأكل في وجباته وبدأ معها هاجس هل الأكل كويس؟! هل هو صحي أم لاء هل   حيشكل مشاكل في المستقبل ؟!!

الدولة الحين قاعدة تسوي شغل جبار من ناحية توعية المستهلك حيث أننا كدولة نعاني من السمنة عند الأطفال وهالشي ما ابي يوسف بيوم من الأيام ممكن يعاني منه لذلك صايرة اهتم كثير بأكله ..

والجميل في الموضوع أن المستشفى اللي ولدت يوسف فيها هي مستشفى الطبي الدولي بجدة ومن ضمن برنامجها يوعونك اكثر على موضوع الرضاعة الطبيعي وايش كثر هي مفيدة طبعًآ بالتعاون مع وزارة الصحة وهذا مثل ما هو واضح توجه البلد ..

وبدأ الحماس .. وقررت اني اترك وظيفتي ( في بدائل للأم العاملة ولكن أنا قررت اترك الشغل ) بحكم أني ما كنت اقدر اتخيل إني بلحظة ممكن اترك يوسف لو ساعة فما بالك دوام كامل .. ولذلك تركت الشغل وتفرغت لبيتي ..

هذا مو معناته أن الأم اللي مازالت تشتغل معناه ما تحب ولدها أو العكس .. ولكن أنا ما أتخيل اني اترك يوسف ٨ ساعات وارجع .. لو يعطوني مليون ..

المهم نرجع لموضوعنا 🙂

بإختصار بالنسبة للثلاث الشهور الأولى كنت بس رضاعة طبيعي وينسون ومجلب وموية وتمر بس ..

والثلاثة الأشهر اللي بعد كذا يعني من بداية الرابع إلى السادس وانا أعطيه اكل من هذه الماركة .. بالإضافة للعصيرات الطبيعية وابدأ أعطيه اكل شوي جامد مو كله سوائل ..

Processed with VSCO with a5 preset Processed with VSCO with a5 preset

أعتذر لعدم جودة الصورة لأني كتبت الموضع متأخر واغلب المنتجات خلصت ..

طبعًا رح تلقون بالخلف عبوة سيريلاك بس الحق ما اكل منها .. لأنه تعود على طعم ماركة جيربر فما عجبه طعم السيريلاك وظلت العلبه موجودة كل ما جا أخوي اكل منها ..

والحين نجي للمهم .. من سن ٧ اشهر إلى الآن.. يوسف عمره الحين ٩ شهور وبديت اعطيه هذه الماركة من الأكل كفطور وعشا ..

هي عبارة عن شوفان مع مجموعة جيدة من الحبوب .. احب اضيف معه حليب بارد وعسل كمحلى وقرفة ..

 تعتبر اكثر وجبة يوسف يستمتع فيها ..

Processed with VSCO with a5 preset

وما اكذب عليكم أحيان كثير اشاركه في الأكل من كثر ما ان طعمه جيد 🙂

Processed with VSCO with a5 preset

مدري ليه احس كل ما ياكل يوسف هالاكل احس اني قاعدة اسوي خير فيه واستنانس على نفسي وأكون بقمة سعادتي لأني قاعدة احببه علي الاكل

الصحي ..

وهذا نوع ثاني هم بعد طعم كثير .. التفصيل تلقونه بأسفل الصور

بالنسبة لـ  Organix multigrain porridge with added vitamin B1  شاريته من مانويل تقريبا بـ ٣٥ ريال .. بالعربي اسمه عصيدة مولتغرين مع فيتامين ب١ ..

أما النوع الثاني فهو  Organix Banana & Plum Porridge with added vitamin B1  بالعربي اسمه عصيدة الموز بالمرقوق مع فيتامين ب١ وسعره هم بعد بـ ٣٥ ريال تقريبا وبالنسبة الشي الحلو في هذا النوع أن حبات الشوفان فيه كبيرة وكاملة ..

أما بالنسبة لـ Garber  هم بعد من مانويل وسعره تقريبا في حدود ٢٢ أو ٢٣ ريال وهو عبارة عن وجبة شوفان مضاف له الخوخ والتفاح ولكن حبات الشوفان هنا مطحونة..

معلومة أخيرة .. أنا ما أمنع يوسف من أنه يجرب اكلات ثانية وماسكة بس نظام صحي تماما بالعكس الوجبة الرئيسية هي مثل ما ناكل  كبسة إيدام أي شي بس حذرة لبعض المنتجات مثل الجبنة السايلة كرافت أحس انها دهون ونقطة جبن لذلك مستحيل اخليه يجربها اذا كبر هو حر ياكل اللي يبي .. لكن احرص على طريقة اكله وهو صغير وهم بعد السكر .. دايم استخدم العسل كمحلي لأكله لأن بجد اضرار السكر كثير سيئية هذا مو معناته اني ما احط له سكر .. استخدم السكر في حالات معينة ..

وبس .. امتنى تشاركوني النظام الغذا’ئي حق اطفالكم ..

Follow:

Leave a comment

  1. January 29, 2018 / 4:48 PM

    مرحبا داليا ، تدوينه جداً جميله ومهمه لكل أم حابه تهتم بنوعية اكل طفلها ، وفرحانه كثير أنك حريصة على صحة طفلك واختيار الأكل بأهتمام ، لأن نوع الأكل هو الأساس الي بيكبر عليه الطفل وبيأثر على ذوقه وميوله للأكل والجسم يتعود عليه ، سبحان الله الجسم إذا تعود على اكل معين خلاص مايشتهي ياكل الا هو ، والكلام ينطبق على الاجبان والسكريات والاشياء المصنعة ، وطبعا مايحتاج اوصيك على الفواكة الطبيعية وتخلينه يتعود على السكر الطبيعي وابطعم الطبيعي ويتعود على الاكل الطبيعي قدر المستطاع ، عشان يكبر على هذا الذوق الجميل ويستنكر المواد المصنعة ، واذا بتقدري تجنبي الاجبان لانها مؤذية ولا فيها فائدة فقط بواقي دهون ، وربي يحفظه لك ويكبر
    ❤❤ وتكونين فخورة فيه وربي يحفظكم له ، وياجمال يوسف ماشاءالله ، كيوت ربي يحفظه 😻🎈🌹

    • onlydalya
      Author
      January 29, 2018 / 4:56 PM

      حياتي انت بجد صادقة وكلامك حمسني اكثر .. لان كثيرزتجيني انتقادات شوفي نحن اكلنا وماصار فينا شي ومن هالحكي .. بس بمن اشوف طفل سمين اتعب له قلبي يوجعني عليه .. وأصبحت أمراض الكبار تصيب الصغار من سكر وضغط وكليسترول هذا كله من ايش !؟؟ اكيد من اكل الفاست فود والاك الغير صحي .. الأطفال أمانة وهم بعد جسمنا أمانة رح نحاسب عليه ..
      وربي يحفظك يا قمر ويخليك لغاليينك ونتعلم منك 😘♥️♥️♥️

      • January 29, 2018 / 5:11 PM

        لايهمك ابداً كلام الناس ، صحتك وصحة عائلتك اهم ، ومين قال انه مافيهم شيء ، بالعكس ، هشاشة العظام واوجاع المفاصل والضعف والصداع ، والتعب الفجأه ، بس تعودوا على هالاعراض ويشوفونها عادي للاسف ، وبالواقع هي بداية لامراض الله يكفينا الشر بالسنين القادمة ، استمري ولايهمك احد ياجميلة ❤❤❤❤.

        • onlydalya
          Author
          January 29, 2018 / 5:33 PM

          أكيد يا قلبي رح استمر وان شاء الله ربي يبعد عننا هالأمراض ونكون بصحة وعافية ..

  2. khulud _talal
    January 29, 2018 / 6:54 PM

    تدوينة جميلة ، ربي يقويكي وتكملي السنتين رضاعة ، قبل السنة لاتتدخليله الحليب البقري ولا اي شي من منتجات الابقار فيها خمائر امعاء الطفل لسا صغيرة عليها بالنسبة للأكل أنا خياري دائما اكل البيت المطبوخ من خضار وفاكهة واحب امزجله كم
    نوع مع بعض ، مثلا مهروس الافوكادو مع الموز مسلوق البطاطا الحلوة مع التفاح ، ، مسلوق البطاطس مع الجزر والكوسة ، موز مهروس مع كمثرى مسلوقة شوي ..

    • onlydalya
      Author
      January 29, 2018 / 7:42 PM

      حياتي لولو .. صح كلامك بس تصدقي كنت احطه له حليب المراعي كويس انك ذكرتي هذه المعلومة طيب هل تنصحيني بحليب الصويا مثلا الحليب النباتي بديل الحيواني ؟؟ ولا شنو الحل ؟ لان مع الشوفان لازم حليب او لبن زبادي ما احب احط له مويا لانه مارح يكون طعم 😢 😅
      وفعلا بالنسبة للخضار اسلقها له .. البطاطا الحلوة يحبها ويحب البطاطس العادية وكمان يحب شربة العدس دايم أسويها له .. 😍♥️♥️♥️

  3. Om Reema
    January 29, 2018 / 8:36 PM

    اهلين دلو ماشاء الله عليك الله يقويك 👌🏻
    تقريبا انا سويت مع ريما زيك بس كنت الخضار اسويلها من البيت والفواكه بعض احيان جاهز بعض احيان من البيت لكن مع الشوفان جربي حليب السيميلاك لنفس عمرو ممكن يعجبو وريما ماكنت احطلها سكر من دون وعلى الحليب لسه ماسار سنة لاتستخدمي انواع ثانية

    • onlydalya
      Author
      January 29, 2018 / 8:46 PM

      يب يب يبيلي اشوف كيف .. يعطيك العافية ع الإضافة فعلا 👌🏽 ما فكرت في الحليب لانه متعودة ع الرضاعة الطبيعي والحين توهقت لمن صار مع الشوفان.. المشكلة انه يحبه كثير كل يوم يأكل منه وانا ما احط له سكر بالعكس احط له عسل وهو يحب العسل والتمر ..

  4. ghaidaa
    January 31, 2018 / 5:53 PM

    حبيت التدوينه مره بالرغم اني مو ام لسا بس استفدت حبيت اهتمامك بالاكل الصحي لطفلك بس عندي سؤال، مره قريت انو العسل للاطفال اقل من سنه مو كويس هل هذه المعلومه خاطئه؟ لانو انا اعرف انو مفيد بس مدري للطفل ماعندي خلفيه. كمان اول مره اعرف انو يبداو ياكلو من شهر ٤ احسبهم من شهر ٩ او ١٠ هذي معلومه جديده عليا 😂😂 مره الاكل يحمس صراحه بالعافيه عليه حبيبي الله يحفظه ويحميه ليكي ❤️❤️🙏🏼

    • onlydalya
      Author
      January 31, 2018 / 6:02 PM

      معلومتك صحيحة بس هي تصير مو مع كل الأطفال .. وحالات نادرة جدا ولذلك قلت بسم الله ويوسف مرررة يحبه وما يكون مركز جذا خفيف .. وبالنسبة للأطفال الاكل من سن ٤ شهور تبدأي تدخلي اكل غير الحليب بس ما يكون اكل جامد .. يعني خضار مطحون وكذا مثل شربة القرع 😉♥️♥️ كنت أسويها له هي وشربك العدس كان يستانس عليها

Leave a Reply || اترك تعليق هنا