Ikea Purchases .. مشترياتي من آيكيا

أهلين ..

كيف الحال ؟!! إن شاء الله تمام وعال العال ..

اليوم الموضوع اللي بحكي عنه يمكن كثير ناس تكلمت فيه لين ممكن للبعض اصبح ممل بالنسبة له ..

واللي هو مشترياتي من آيكيا ..

بس هالمرة مشترياتي موب أثاث واكسسوارت منزل !!

هالمرة شريت اكل من عندهم !! ما أقصد المطعم .. اللي اقصده قسم الأغذية 😂

المهم قبل لا نبدأ نجهز قهوتنا عشان نستوعب شنقول 😉

المهم قبل لانبدأ نجهز قهوتنا عشان نستوعب شنقول ..

بصراحة على كثر ما أروح آيكيا .. واشوف قسم الأكل الا عمري ما رحت وشريت غير الشوكولاته اللي قالي عليها محمد وامشي بدون لا افكر او حتى ألقي نظرة على المنتجات بحكم اني أكون تعبانه وودي اطلع او مستعجلة  ..

ولكن هالمرة تغير الوضع يمكن بحكم اني كنت ابي اسكت يوسف عبال ما محمد يحاسب قلت خلني اروح اشتري له شوكولاته وكذا ..

وأنا ماشية لفت عيني الشوفان .. 😍 وبصراحة نقطة ضعفي خصوصا أنه فيه التوت الأزرق والفواكة الثانية اللي يحبها قلبي ..

لذلك قمت قشيت مثل اللي في الصورة ..

وقلت خلني اجرب موب خسرانه ابد 😌 ..

كل هذه الأشياء ماجات١٠٠ريال بالضبط طلع لي٧٢ ريال فقط .. 🤓

المهم نبدأ بحبيب القلب ..

 الشوفان .. 😻♥️

بجد شهادتي فيه مجروحة ..

من كثر انه طعم صرت اكله بروحه وكرنشي كذا يقرمش وحتى ان حطيت معه حليب واكلته على طول عشان لا يتشربه

الحليب كثير فيه شوي قرمشة ..

لذيذ لذيذ لذيذ ..

أتعب وأنا أقول أنه لذيذ ..

وسعره هم بعد لذيذ .. في حدود الـ ٣٠ ريال ما تتعدى ٣٥ ريال ..

 

شايفين شكثر شكله لذيذ .. هذا وأنا ضايفة الحليب وهو مقرمش ..

وفي هذه الصورة أضفت عليه عنب أسود بدون بذر …

يا قلبي ما أقول شكثر لذيذ ..

بجد ما أبالغ هذا ذوقي وأنا حرة فيه بجد اطعم شوفان ذقته  .. خفيف وهش ..

💜💜💜💜

ونجي للمنتج إللي بعده ..

بسكوت بالزنجبيل .. 🧐

حبيته .. وحاولت اتفلسف فيه وقمت حطيت فوقه جبنة بيضاء مع أوراق من النعناع ورشة كمون ..

بالبداية طلع اليم .. بس بعدين ما قدرت استسيغه 🤪

بس الحقيقة شكله  كان مشهي ..

والحقيقة أنه طعم بروحه بدون الإضافة والفلسفة اللي سويتها .. يعني لو كان مالح كان تمام..

كم سعره ؟!!

بصراحة ما اذكر ولكن سعره جميل وخفيف ..

هل انصح فيه أي .. لكن في اللي احسن منه بكثير ومراحل وهو المنتج اللي بعده ..

بسكوت بالقرفة

هذا البسكوت الجميل واللذيذ كل عيلتي حبته وخصوصا يوسف القلب ♥️

صار كل ما يشوفه يعطيه شهقة ويصفق بيدينه فديت قلبه والله

كميته كبيرة وسعره هم بعد حلو بس ما اذكر بكم لأن الحقيقة والواقع إني رميت الفاتورة بالغلط .. 😤

هل أنصح فيه نعم وبقوة .. يكفي أن يوسف عجبه 😋😉

يذوب في الفم ويقرمش وحلاوته لذيذة يعتبر من البسكوتات الحالية لكن حلاه موزون

ما يغث ابد ..

والحين نجي للكلام الكبير .. الشوكولاتات ..

♥️♥️  ♥️♥️

هالشوكالاته .. لذيذة .. وطعمة ↡

اعطيها ٨،٥ من ١٠ .. رح اشتريها اكيد مرة ثانية

.. ..

أما هذا النوع من الشوكولاته ..

فهو طعم ولذيذ بس مو مثل الأولى أطعم منهم

 بكثير يعني الأولي ماعندي مشكله اتعنى لها

بس هذولي لاء يعني ممكن ما اشتريهم واجرب أشياء ثانية بدالهم ..

.. ..

وبس في الختام ان شاء الله ما أكون ثقلت عليكم أو اني غثيتكم بموضوع قديم ..

وابيكم تشاركوني بمشترياتكم اللي شريتوها من قسم الأغذية في آيكيا ..

شنو تنصحوني ؟!!!

♥️♥️ ♥️♥️

آخر صورة مع الحبيب ..