Best Moments Of 2018 | أجمل لحظات ٢٠١٨

” New Year, New Feels, New Chances. Same Dreams, Fresh Starts. “

 

أفكار كثير براسي .. مليون مرة اكتب مقدمة لهذه التدوينة واحذفها .. مشتات كثيرة حواليني تمنعني من التركيز في كتابة هذه التدوينة ..
 
 
بعقلي كل شي يمشي بطريقة إنسيابية بس مجرد ما أمسك القلم عشان اكتب هذه الافكار وتتجسد كحروف .. تهرب مني فورا .. تتركني بحيرة وين الحكي والكلام الجميل اللي كان بعقلي قبل شوي ؟!!
 
 
اعتذر عن هذه المقدمة المليانه طاقة سلبية وعجز .. بس هذا وضعي الحالي مشتته ما بين أمور كثيرة .. وأحس أن أغلب وقتي يروح مني وأنا بس قاعدة ما بين رهف ويوسف 😅 ولم يجي وقتي تكون طاقتي منتهية فأروح أحط راسي ع المخدة وأنام ..
 
 
المهم متحمسة على موضوع البوست هذا وهو نكتب مختصر لأهم الأحداث اللي صارت لنا في سنة ٢٠١٨ ..
 
كالعادة جهزوا مشروبكم المفضل وأقروا البوست وأنتوا رايقين لأنه ملغم بالصور 😍 وإن شاء الله ما يكون غثيث على قلوبكم ..
 
 
 
 
 
 
الحقيقة هذه السنة عجزت القى لها وصف يصفها .. برغم أني أحس بمجملها مافيها شي حلو كثير إلا أن في أحداث صارت بالنسبة لي هي من أهم وأجمل الأشياء اللي اختبرتها على الصعيد الشخصي والعملي بعد ..
 
 
رح اذكر مقتطفات بسيطة لكل حدث مهم بالنسبة لي والأهم أني رح أذكرها على حسب أهميتها بالنسبة لي وليس على حسب تاريخ حدوثها ..
 
 
على الصعيد الشخصي أختتمت هذه السنة بولادة صغيرتي رهف ١٨/١٢/٢٠١٨ بهذا اليوم ربي رزقني بأميرتي الجميلة رهف ..
 
 
 
 
ثاني أهم لحظة / مناسبة واعتبره بنفس الأهمية حبيبي يوسف أكمل عامه الأول بتاريخ ١٤/٤/٢٠١٨
 
 
 
 
 
 
شهر أبريل
كنا مخططين لسفرة لجزيرة وقضاء وقت ممتع والحمدلله تسهلت وسافرنا وقضينا أجمل الأوقات ..
 
 بعض صور من رحلتنا لجزيرة Pangkor  
 
 
 
 
 
 
رح أكتفي بهالكم صورة لأنه شغالة على هالموضوع بحيث أني أكتب تفاصيل الرحلة مدعمة بالصور وهم بعد مدعم بفيديو رح انزله بقناتي بس مدري متى ناوية أخلصه .. 
استحملوني معليش  😅
 
شهر جانيوري
كان من ضمن تخطيطي لهالسنة أنه نعيش أجواء رأس السنة وكوننا عايشين بجدة فمهما قلت درجة الحرارة أبدا ما توصل لأقل من ١٠ الا في النادر لذلك قررنا نروح مصر ونجتمع مع افراد العيلة ونعيش أجواء جميلة شتوية وكانت من أجمل اللحظات اللي قضيناها في هذه السنة حيث أني أخيرا حسيت أني بشتى وأحيان كانت توصل درجة الحرارة لـ ٧ و ٦ وهالشي ابدا ما كان موجود بجدة
 
 
 
 
 
  
 
 
 
 
  
 
 
 
وبهالشهر هم بعد قررت بعد طول تفكير أني أفتح قناتي باليوتيوب وكانت اول ڤلوق لرحلتي لمصر ..
 
 
وعلى الصعيد العملي كانت أول سنة لي عقب تركي للعمل واتجهت للبزنس الخاص ( فاملي بزنس) وافتتحت البوتيك .. والحمدلله
رابط البوتيك على حساب انستغرام 
  
 
برغم أهم الانجازات اللي حققتها في هذه السنة بالأخير ما أدري ليه مو قادرة أحس أني انجزت فيها شيء ومتفائلة أكثر بالسنة الجديدة ٢٠١٩ ومتوقعة أنها رح تكون أفضل بكثير من سنة ٢٠١٨ ..
 
يمكن لأني كنت مخططه على أشياء كثيرة اسويها وما لحقت عليها ؟! 
 

اتمنى أن هالبوست يكون خفيف ولطيف عليكم وياريت تشاركوني عن أجمل اللحظات اللي قضيتوها في سنة ٢٠١٨

Follow: