Sephora Masks fist impression | ماسكات سيفورا وأول انطباع

Sephora Masks fist impression | ماسكات سيفورا وأول انطباع

” Let your confidence shine, pretty girl “

مرحبا يا حلوين ..

قبل اسبوع رحت سيفورا وقررت اجرب من عندهم الماساكات ..

بصراحة دايم كنت اروح سيفورا لغرض معين وامشي بدون ما اقعد افرفر هناك بإستثناء لو كنت بالخارج برا السعودية..

المهم المرة هذه كنت مروقة ورهف كانت نايمة فأخذت راحتي وقعدت افرفر بسيفورا

وبصراحة دايم ما تلفتني شكل الباكجات الخاصة فيهم خصوصا حق الماسكات 

ما قدرت امسك نفسي وطلعت بماسكين وهو كالتالي :

 

الأول ماسك تحت العين أسمه

Masques Yeux Perle

Pearl Eye Mask

 

بالعربي يعني ماسك العين باللؤلؤ ..

سعره ٢٥ ريال ..

 

هالماسك يوعد بأنه يرطب المنطقة اللي تحت العين ويفتحها ويخليها ناعمة

من أهم مكوناته خلاصة اللؤلؤ

 

ويوعد بأنه على طول رح يفتح محيط العين ..

 

 

رأي المتواضع ..

 

أول شيء لفتني ريحته جدا جميلة من فتحت المغلف والريحة انتشرت ..

بعد كذا أول ما حطيته على بشرتي كان عادي بعد دقيقة تقريبا بديت أحس ببرود تحت عيوني وهالشي حلو ..

 

 

ملاحظة : بطبيعتي ما عندي هالات سودة تحت العين ولكن برمضان كنت اسهر كثير غصب عني فبدت تغمق هالمنقطة ..

فعلى كلامهم المفروض على طول يفتح المنقطة

 

والنتيجة بعد ١٥ دقيقة هي كالتالي :

 

بالنسبة للنعومة بصراحة ما حسيت أن في شيء يعني لم استخدم كريماتي أحس بنعومة اكثر الإحساس اللي حسيته أكثر ( مثل لم تمرري يدك وكنها مدبكة شوي كذا يعني لم تمرري يدك على المنطقة تمشي وهي متقطعه مدري شلون اشرح بس مو نعومة  ) ..بالإضافة أنا ما عندي انتفاخ تحت العين ولا ذاك السواد الجامد عشان الاحظ الفرق ولكن كتجربة بصفة عامة عادية يعني جربت ماسكات كورية قبل ولاحظت فرق اكثر من هذه ،،

 

افكر اشتري كذا ماسك منه واجرب حق أسبوع عشان اقدر الاحظ الفرق احس انه ما رح يبين على طول واعطيه تجربه ثانية  🙂

بليز اللي جربت هالمنتج تقولي كيف كانت تجربتها ..

تمنيت من قلبي أن يضبط عشان كذا بعطيه تجربه ثانيه قريبا ..

بس هذا انطباعي الأول بالنسبة لي 

** **

 

 

 

 نجي للمنتج الثاني وهو

Patch Bez Charbon

Charcoal Nose Trip

بالعربي يعني لصق الأنف بالفحم

أيش يوعد

على كلامهم أنه غني بالفحم لذلك فهو

فعال في إزالة الرؤوس السوداء حالاً ويفتح المسام ..

بالإضافة أنه يزيل الشوائب والدهون الزايدة

يعني رح تحس بفرق كثير للبشرتهم دهنية في هذه المنطقة

رأي المتواضع ..

في البداية حابة أوضح أنه ما عندي كثير رؤوس سودائ بخشمي ولكن أول ما شلت اللصق

لقيته شايل كم حبة بس هل شالهم كله طبعًا لاء بس شال شوي

ما عندي دهون كثيرة في هذه المنطقة فما أقدر أحكم بصراحة

بس اللي متخوفة منه أن أنا عندي مسام واضحة في هذه المنطقة ولأنه يفتح المسام فأخاف يكبرها لي زيادة أو أنه يخليها مفتوحة

بس النتيجة مرضية بالنسبة لي ..

من الأخر هل افكر اشتريه ..

بصراحة رح أشتريه مرة ثانية بس عشان أجربه مرة ثانية و أنا مو منظفة خشمي عشان أشوف النتيجة شلون

وشال كم حبة من الرؤوس السوداء لذلك تحمست اشتريه مرة ثانية واجرب

بس هل أقدر أقول عليه ممتاز بالأمانة لاء يعني قد جربت منتج كان أفضل منه بكثير بس قوي جدا ورح اسوي عنه ريفيو إن شاء الله

وبكذا أكون وصلت لنهاية الفقرة وأتمنى تشاركوني تجاربكم من ناحية الماسكات

هل جربتوها وكيف كانت النتيجة؟!

وأتمنى لكم يوم جميل مثل روحكم ..

Follow:

Leave a Reply || اترك تعليق هنا

%d bloggers like this: