New Chapter | فصل جديد

New Chapter | فصل جديد

” Get into the habit of asking yourself: ” Does this support the life I’m trying to create”

أهلا يا أصدقاء ..

مدري شجوي اليوم بس مدري حاسة أني ببداية مرحلة جديدة بحياتي .. كنت الفترة الماضية اتخبط كثير .. واجرب أشياء كثير وأحاول أني ادخل في أشياء كثيرة لين تهت .. وتعبت..

أي صح وأنا اكتب هالتدوينة بالصدفة لقيت بوست لأسماء That Red Lip حاطة اقتباس وحبيت أضيفه لأنه بجد بجد مناسب جدا للموضوع اللي بسولف عنه هنا ..

البدايات الجديدة دائمًا ما تأتي متخفية في شكل نهايات مؤلمة

يا بدايات المحبة يا نهايات الوله

 

ومثل ما عودتكم على طقوسي في بداية كل تدوينة لا تنسوا تجهزوا مشروبكم المفضل وخلونا نقرا برواق .. 

هاك هاك كلّي ضمني لك احتويني حنني
أنا من لي شوف عينك غير دربك دلني

تتلخص الدنيا بحبك ايه وربك
ياللّي ماغيرك ضروري

عالمي والناس إنت وحدك إنت
فيك متمادي غروري

مدري عاد اليوم الجو مجيد والحقيقة أنه دايم حاضر لذلك حبيت اضبط الجو أكثر وتقدر تشغل الأغنية هنا اذا ودك .. 

 

 

المهم عاد الحين لازم ندخل الموضوع وكفاية مقدمات ..

**

قررت لوهلة أني أوقف كل شيء وأبدأ اشيك على الشي اللي مسوي لي قلق مزعج ومخليني معصبة .. تقدروا تقولوا أني مسكت الجرح .. واتخذت فيه قرار نهائي لأنه كان بالنسبة لي متعة وببالي أني احوله لدخل ثانوي ولكن لانشغالي الدائم قررت أني ما اتسابق مع الزمن لأنه اصبح يأخذ مني أعز شيء عندي اللي هو صحتي ونومي ووقتي اللي المفروض اقضيه للتسلية اصبح شغل متعب وفي حال ما أنجزته يطول المشوار فيه ..

 

ما تركته ولكن قررت أني ما أهتم كثير للشروط اللي حاطينها إللي هو ” قناتي باليوتيوب” كان فاضل اقل من ١٠٠ ساعة واحقق الشروط وابدأ ادخل منها دخل ثانوي .. ولكن بسبب سفرتي الأخيرة وضغوطات الشغل الخاص واللي هو الأهم طبعًا والأهم من كل شي يوسف ورهف  فما كنت اقدر اوفق بينهم كلهم في الفترة الأخيرة وأكون ملتزمة فأصبحت الالجاريذيم تخفي فيديوهاتي وشقاي حق سنة وبكذا عدد المشاهدات عندي مرة صار قليل ومع الوقت أصبحت الساعات تروح مني وبدل ما يكون فاضل بس اقل من ١٠٠ ساعة صار حول الـ ٤٠٠ ساعة وقاعدين يزيدون ..

 

فأتخذت هذا القرار بأني ما رح اعتمده كدخل ثانوي .. رح اخليه فقط للمتعة يعني لا فضيت وكان لي نفس أني امنتج رح اشتغل غير كذا أبدا ما رح اضغط على نفسي ..

 

والسب أن عندي اهداف كثيرة وأحلامي كبيرة جدًا وأحس الـ ٢٤ ساعة ما تكفي فصار لازم اتنازل عن أشياء ثانوية بأشياء اهم ..

 

وهنا رح نجي للأهم ..

 

في كل مرحلة بحياة أي انسان تكون بداية لنهاية سابقة .. مثل الجنين لم تنتهي مراحل حياته ببطن أمه وتبتدي مع أول صرخة نفس في هذه الحياة ..

* عاد هذه مقولتي كتبتها وبعدين قريت اقتباس اسماء عشان كذا اضفته ..

 

دائما النهايات تكون بدايات لمراحل قادمة .. فمن تجربتي المتواضعة في الحياة كل ما كانت النهاية مأساوية كل ما كانت المرحلة اللي عقبها أجمل وفوق التصور .. لتحقيق الأهداف والغايات نحتاج الكثير الكثير من الجهد والمثابرة والألم ..

 

مدري فجأة حسيت أني قاعدة اتفلسف شوي .. اعذروني من فترة ما حسيت براحة البال .. بجد قرار بسيط ممكن يغير نفسيتك .. أحلامك ، طموحك.. 

 

المهم تمنولي التوفيق في المشروع الجديد اللي قاعدة اشتغل عليه أنا وشخص عزيز وقريب من قلبي وقريبًا بإذن الله يشوف النور .. 

 

على طاري الإقتباس

حسيته كثير يمثل حالتي الحالية .. لذلك حبيت استفستح وانهي فيه أيضًا ..

” Get in to the habit of asking yourself: ” Does this support the life I’m trying to create”

** 

البدايات الجديدة دائمًا ما تأتي متخفية في شكل نهايات مؤلمة

 

 

السعادة في صورة
Follow:
Share:

14 Comments

  1. Anonymous
    October 21, 2020 / 1:49 PM

    الله يسهل لك كل خير حبيبتي داليا 💛
    تدوينتك تطبطب ع الواحد، اتمنى ربي يكتب لك الافضل دائما و اكيد تنازلك عن جزء من اليوتيوب بيسمح لك بجزء كبير من شي اخر يمكن هو الافضل لك 👌
    قناتك تستاهل الافضل دائما بس يمكن مو الحين 🕊️ تذكري احنا متابعينك بكل مكان راح نكون منتظرين ابداعك سواء مدونه او انستا او يوتيوب 💛💛

  2. onlydalya
    Author
    October 21, 2020 / 2:24 PM

    يا صديقتي الجميلة تعليقك بالنسبة لي هو الطبطة الجميلة ويازينك ويايزين حظي بوجود ناس مثلك بمساحتي المتواضعة ..

  3. October 21, 2020 / 3:40 PM

    بالضبط هالوضع حالياً اعيشه ولازلت اتخبط وابحث لي عن دخل خاص فيني واحقق لي اهدافي واحلامي لكن مازال التخبط موجود ونحاول نبحث عن طرف خيط نتمسك فيه ويخرجنا من هالازمه على خير .
    حقيقي تدوينتك لامست اشياء فيني كنت متوقعه انها بس تحصل لي لكن الظاهر انه حالة تعصف بالجميع .

    • onlydalya
      Author
      October 21, 2020 / 5:07 PM

      أهلا بالجميلة خلود ..
      هالجائحة عصفت بالكثيرمن الناس لذلك الحمدلله الف مرة على وضعنا .. ولكن الشخص يطمح للأفضل وعدم الثبات .. فالثبات مع الوقت يعبتر نزوول .. ولا تيأسي يا عزيزتي بإذن الله ستفرج وستجدي مرادك يا رب عاجل غير آجل ويطرح البركة في حياتك ..

      اسعدني كثير مرورك هنا وتعليقك بمساحتي

  4. October 21, 2020 / 7:36 PM

    كل الحب و التوفيق لك صديقتي الجميلة داليا و متحمسه اشوف انجازات الجميلة 😍❤️❤️❤️ .

    • onlydalya
      Author
      October 21, 2020 / 8:02 PM

      يسعدلي قلبك الاء وعقبال اشوفك بعد باعلى المناصب يا جميلة القلب والروح ♥️♥️♥️

  5. Soos
    October 22, 2020 / 4:47 AM

    May Allah always bless you in everything you do. I understand the the feeling of not being able to do everything you want to do that you have your mind put to and try to do too many things at one time and you get fuzzy in the brain but I’m sure that you will be happy in this next chapter and that allah always blesses you and I wish you the best. I can’t wait to see what you have in stored for us 💜☁️

    • onlydalya
      Author
      October 22, 2020 / 11:01 AM

      Dear Soos,

      Many thanks for your lovely words and kind, so true and I believe that soon I’ll achieve my dreams to be honest I start feeling the test of success ..

      Thank you again for coming here and leave beautiful words and may allah make all our wishes to come true ASAP ..

      have a nice day ..

  6. ربى
    October 22, 2020 / 10:23 AM

    كأنك تعرفين وش يدور ببالي هاليومين ! .. حالياً اتخبط بين اهدافي الصحيه والروحيه وبين تطوير مهاراتي والبحث عن مصدر دخل ، شكراً داليا ع هالتدوينه والله يكتب لنا التوفيق والوفره جميعاً 🙏🏼❤️

    • onlydalya
      Author
      October 22, 2020 / 11:04 AM

      عزيزتي ربى ..

      سعيدة جدا بمرورك هنا .. الله يسعدك ويوفقك ويرشدك للطريق اللي يريحك وتلقي فيه كل اللي تتمنيه وأكثر بعد ويطرح البركة بدربك ..

  7. October 22, 2020 / 10:37 AM

    قلبي داليا..
    أعرف شعورك مرره كويس وأهنيك على قوتك في اتخاذك هالخطوة، مره سعيدة انك عرفتي سبب ألمك وقررتي تتعاملين معاه 💓

    متأكدة إنه التشابتر الجديد بيكون أجمل وأريح وأروق وبيكون مليان ذكريات حلوة ونجاحات من نوع آخر ❤❤❤

    من كل قلبي أتمنى لك التوفيق 💓

    • onlydalya
      Author
      October 22, 2020 / 11:09 AM

      آهـ روان فوق ما تتصوري كمية راحة البال والنومة الهنية وعدم القلق وأحساس كني أركض طول الوقت متعب جدا ..
      اكتشفت حاجة فيني .. أني ما أحب اكون عبدة للعمل أحب اكون سيدة للعمل وهناك فرق كبير بينهم .. واتوقع انك تعرفين وش اقصد كوننا سيدات اعمال المستقبل ..

      لم تشتغلي بشروطك وقوانينك وتحددي اهدافك وانت الكل في الكل فرق بين أنك تتبعي قوانين وشروط غيرك ،، أبدا ما أعيب ولكن من خبرة وتجربه في المجالين ..

      فعشان كذا قررت أني اركز على الأشياء الأهم في حياتي وابعد اي شيء يؤذيها

      سعيدة بمروك واتمنى لك كل التوفيق في حياتك يا قمر

  8. Anonymous
    October 22, 2020 / 11:53 AM

    داليا، حسيت بشعور عجيب يوم قلتي إنك مسكتي عالجرح، ناس كثييير يخافون يسوون هذي الخطوة الجريئة فأهنيك ما شاء الله
    الشيء الثاني العجيب إنه قد ايش مجرد تغيير القناعات الداخلية يخلق لنا أجواء مريحة
    بارك الله لك وفيك وبالتوفيق دائمًا وأبدًا

    • onlydalya
      Author
      October 22, 2020 / 11:43 PM

      عزيزتي ..

      أحس هالشي يعتمد على شخصية الإنسان .. وبطبيعتي ما أحب المكابرة وخصوصا لم الموضوع لامس أشخاص مهمين عندي اللي هم يوسف ورهف بحكم أني ما انام صح وما أروق فأضل معصبة طول الوقت وهم مالهم ذنب أنا تركت وظيفتي بشركة كبيرة وبترقية بعد عشانهم فلم شفت روحي مقصرة فقلت هنا وقفي خلاص ما يحوج وكان هدفي أنه دخل ثانوي مو اساسي الحمدلله عندي الاساسي بس كانت الفكرة أن شي ممتع وهم بعد يدخل دخل شي جميل .. لكن المتعة تحولت لهم وهالشي خلاني اقعد فترة احس اني مو قادرة انجز واني عاجزة وهالاحساس ما احبه فيني ..

      لذلك كان لازم وقفة حازمة تنهي الموضوع .. وفعلا مجرد ما اتخذت القرار وقفلت برنامج المونتاج وانا بوسط تعديل فيديو تقريبا جاهز منه ٩٠٪ لكن ما قدرت اكمل ..

      ما اقولك على كمية الراحة والروقان اللي جاتني وكمية الأشياء اللي انجزتها وراحة البال .. وبوقتها كتبت هذه التدوينة لأنه حسيتها مثال رح يلامس كثير من الاشخاص اللي مثل وضعي ..

      وبس والله .. شرفني مرورك واسعدني تواجدك في مساحتي واتمنى لك كل التوفيق والنجاح ..

Leave a Reply || اترك تعليق هنا

%d bloggers like this: