قد تكلمت قبل فترة عن البدايات وفصل جديد بحياتي وقرار جريء لحتى أوصل لتحقيق أحلامي .. في حال ما قريته فهنا رابط الموضوع : New Chapter   | فصل جديد

**

المهم خلونا نبدأ صح يا أصدقاء ..

بالفترة الماضية تقريبا من بداية ٢٠٢٠ تقريبا بديت قسم جديد بمدونتي وهو خمس أشياء وكان بصراحة من اكثر المواضيع اللي استمتع بكتابتها .. خصوصا أني أعشق قراءة خلاصة تجارب الأشخاص فكنت مخصصة هالقسم لخلاصة تجاربي الشهرية ومنها استذكر الأشياء البسيطة اللي تدخل السعادة بحياتي ..

دائما ما كنت اجد السعادة في التفاصيل الصغيرة .. ككوب قهوة .. 

جلسة بسيطة نهارية أو حتى مسائية في أحد الكافيهات المختصة في مدينتي الجميلة ..

تجربة شيء جديد ..

تعاملي وتطوراتي البسيطة في تعاملي مع يوسف ورهف مثل ما تعلم يوسف واصبح يدخل الحمام بروحه .. ورهف شلون تشكلت شخصيتها الجريئة وأصبحت تعشق الغناء والرقص ..

صنع كيكة أو عمل وافل ( فطور رايق وجميل )..

البحث عن حلول لتطوير البزنس .. تحقيق تارقت .. ادخال خدمات جديدة ..

كتصوير منتجاتنا وعمل تصميم جديد للموقع 

كل هذه الأشياء تصنع يومي وفي الأخير تصبح مجموعة تجارب لشهر ما .. حتى دخل علينا فايروس كرونا وفتك بكل تفاصيلي الصغيرة بعرض الحيط .. امزح دراما كوين 🤪 ولكن الحقيقة من جا هالفايروس وأصبحت حياتي مكررة .. ومع الحجر اتضاعفت الأشغال المنزلية فاصبح المنزل هو مكان الترفيه والعمل والعيلة ..

ومع الضغوطات ما صار عندي وقت احك راسي بصراحة .. وكل ما جيت اكتب تدوينة لقيت أني مكررة كل اموري حق الشهر اللي قبله مع إضافة او تغيير جدا جدا بسيط ..

لذلك وقفت كتابة هالنوع من التدوينات لأنه بصراحة ما ودي اخرب هالسلسلة الجميلة بتكرار الأحداث أو حتى أني اكتب من غير نفس ..

والحين بدأ الوضع يرجع شبه طبيعي وللأسف وأنا قاعدة اكتب الحين ووزير الصحة قدم توصية بالحجر الجزئي لأن عدد الحالات بدأ يرجع يزيد بالرغم أنه بالسابق وصلنا لعدد كويس مقارنة بغيرنا ومازلنا ..

* الحمدلله طلع إشاعة وتم نفي الخبر

عن نفسي وقفت متابعة عدد الحالات لأنه كان يسبب لي رعب وأرق وبصراحة اللي فيني مكفيني ..

وتركت نفسي شوي انغمس في حزني وأكون شوي غير منظمة طبعًا غير البزنس .. وانفس شوي عن مشاعري ..

الحمدلله انتهيت من التنفيس والحين جا وقت الجد .. والقرارات الحازمة لوضع النقط على الحروف ونرجع الأمور لنصابها ..

مدري أحس أني قاعدة اكتب أطول مقدمة في حياتي 🤪🤭

 المهم يا أصدقاء اعذرو استرسالي في التدوين .. بجد ما تتصوروا شكثر السعادة اللي فيني وراحة البال خصوصا بعد القرارات الجريئة اللي اتخذتها بحق نفسي وللبزنس بعد ..

سعيدة جدًا ..

المهم بهذا الشهر يكفي أنه يعتبر الشهر الرسمي لدخول فصل الخريف .. وهالشهر من اجمل الشهور .. كنت دايم أتمنى نسافر بهذا الوقت لبلد تظهر فيه معالم الخريف مثل كندا بريطانيا كوريا يالله ..

كورونا اخذت مننا أشياء كثيرة بدون ما نحس .. حرمتنا حتى المشي بأمان في الشارع والتأمل في مخلوقات الله دون التخوف من الشخص اللي جنبك اذا حامل فايروس ولا ممكن يصيبك هالشخص ولا لاء ..

المهم بوقف ذكر مواقف سلبية وبذكر الإيجابي فقط .. لا مكان للسلبية هنا ..

**

أولاً:  الحمدلله دايم وأبدًا أن الحمدلله أنا وعيلتي وأّهلي بصحة ممتازة ولم نصب بهذا الفايروس الحمدلله .. الحمدلله الحمدلله ..

ثانيًا :  يوسف أصبح يدخل الحمام بنفسه صحيح تأخرت في تعليمه بس هو في هذه الفترة فجأة من نفسه وقرر ولذلك كانت الساعة المباركة ..

هالشي اللي كنت كثير مو عارفة كيف اتصرف واعلمه بدخول الحمام خصوصا أنه قبلها فطمته من الحليب الرضاعة الصناعية وخليته يعتمد على المشرب ..

يمكن هالشي خلاه يحس بأنه شوي كبير بالأضافة لتعلقة بولد خالته مدري كيف قلت له يوسف متى ناوي تبطل الحفاضة وتقول حمام ..

شوف سعود صار يدخل الحمام وكذا .. كلمات كنت اقولها له بين فترة والثانية ولو أني ضد المقارنات سعود اصغر من يوسف بكم شهر وهو مثل ما تقولوا الغيرة الجميلة يعني لم يشوف سعود يسوي شي يحب يسوي زيه أو افضل منه ..

الحقيقة أن سعود وقتها لسه ما تعلم الحمام بس كذا رميتها لأني بصراحة ما كنت عارفة يوسف متى ناوي يتعلم ويقول حمام خصوصا أنه جاتني فترة ما كنت البسه الحفاظة ما اقولكم كمية التنظيف اللي انكرفتها .. مع العلم هو كان يعرف يقول حمام بس عناد ..

لذلك قررت أنه ما اضغط عليه ووقت ما هو يقول حفاضه لاء بوقف .. المهم بهذا اليوم المبارك فجأة قالي ماما سعود يقول حمام صح قلت له أي .. قالي حفاضة لاء يع قلت له صح ..

قام ولبس سرواله الداخلي بدل الحفاضة والحمدلله وعليها ما عاد لبسها ..

من تجربتي المتواضعة الأطفال لا تضغطوا عليهم اعطوهم حرية القرار شوي في بعض امورهم .. لحتى تتكون شخصيتهم ..

بالأول كنت كثير احس بهم بأن يوسف اصبح عمره ثلاث سنوات ويلبس حفاضه كنت أقول متى بيتعلم ..

تعلمت أن الطفل هيئي له البيئية اللي تساعده لاتخاذ القرار ولكن لا تجبريه لأنه بالأخير هو شخص ورح تتكون شخصيته .. فجميل تكون شخصيته قوية وقيادية مو ينقاد مع الغير ..

والميزة الثانية أن رهف بدت تتعلم منه دخول الحمام صحيح ما زالت تلبس حفاضه بس أصبحت تقولي ماما حمام يالله ..

وانا امشي وراها أتوقع هذه الميزة الوحيدة كون الفرق بينهم اقل من سنتين ..

ثالثًا :  بعد ما قررت أني ما اركض ورا اليوتويب واحقق شرط المشاهدات اللي احس اني كل ما وصلت لخط النهاية اطيح وتطير منها الساعات خصوصا من بدأ نظام الالجارذيم وأنا في هبوط شنيع بالإضافة لعدم التزامي فكان يزيد الطين بله ..

ولكن من تركته جاتني راحة بال وأفكار جميلة جدا للتدوين احس أني بديت أرجع داليا اللي اعرفها ..

وببالي أبدأ سلسلة تدوين ثانية بالإضافة لهذه السلسة الجميلة .. وهي تخص التدوين والمدونات والبزنس .. ليه ؟!! بحكم كمية الأسئلة اللي تجيني على حسابي بالانستغرام ليه اخترت ووردبريس مو بلوق وايش الفرق بينهم .. شلون اقدر اكسب من التدوين .. وهل التدوين يعتبر وظيفة وممكن يدخل دخل ؟!!

فقررت أنه بدل ما اقعد اجاوب على كل شخص على حده فرح اخصص جزء بمدونتي احط خبرتي البسيطة فيها وممكن تفيد أي شخص وده يدخل بهذا المجال ..

هذه الفكرة ليست وليدة اللحظة .. بالعكس من زمان بس يوم كنت مشغولة باليوتيوب ومتطلباته فكنت مسويه هولد للفكرة والحين بما أني قررت أرجع للتدوين وبقوة خصوصا أنه يسوي لي دخل بسيط جدا هذا وأنا أصلا هاملته لو حطيت تركيزي فيه بدل اليوتيوب فرح ادخل اكثر .. هذا مو يعني أني رح اترك اليوتيوب فأنا بصراحة استمتع فيه لكن مو لاقيه له وقت فقررت أني ما التزم كل أسبوع انزل فلوق/فيديو ولكن ممكن مرة بالشهر حلو 🤭🤪

المهم نرجع لموضوعنا ..

رابعًا : قبل فترة تواصل معي منتدى جديد اسمه أراجيك وأصبحت عضو رسمي فيه وبديت سلسلة تدوين عن الطاقة الإيجابية وكذا والهدف منها بصراحة أنشهر اكثر بحكم أني حذفت كل ماضي الجميل من تدوين لذلك اعتبر كأني توي جديدة ..

وهذا رابط التدوينة الأولى لهذه السلسلة وتعتبر استفتاحية ..

البداية 

خامسًا : تقريبًا هالشي من فترة قبل أكتوبر تقريبا من شهر June   اشتريت آلة قهوة بالأصح محمد شرالي آلة قهوة شبه احترافية وهي بإذن الله رح تدخلني لعالم الاحتراف لهذا الشي الجميل ..

وأنا اضبط التدوينة اكتشفت أني ما قد صورت آلتي صورة عدلة دايم اصور اكواب قهوة 

صورة أوضح للألة .. هالصورة الجميلة من بنترست 

أوبس وأنا أراجع التدونيه لآخر لحظة اكتشفت أن هذه الآلة مو نفس آلتي هذه المطورة بس حبيت الصورة فمحا أحذفها لكن بحط لكم آلتي نفسها لأن بصراحة عزجت القى صورة حلوة

وبالنسبة لآتي بصورها صور حلوة لم أخلص من تجهيز الكوفي ستيشن حقي .. 

ومن كثر الإستفسارات عنها هم بعد ناوية افصل فيها تجاربي بتدوينة منفصلة عنها

بحيث تكون مرجع لكل محتاج ..

بالمختصر اسمها Brevill Barista Touch

القهوة بالنسبة لي عشق .. هي رفيقة دربي بكل معنى الكلمة .. ومع ألة جميلة مثل هذه وبن مختص دخلت لعالم ثاني وحسيت كأنه توي انولدت ..

حاليًا مدمنة على بن ساوث بلند من محمصة هيمي Hemi

واصبحت روتين صباحي ومسائي ..

وبكذا انهي تدوينتي بكوب قهوة لذيذ وأشوفكم

بالتدوينة القادمة ..

” In 20 Years. You will be more disappointed by what you didn’t do than by what you did “

صباح/مساء الخير

الفترة الأخيرة ومع الأحداث اللي قاعدة تصير خلت وقتي الخاص فيني جدا جدا قليل ..

أصبح أغلب وقتي في المطبخ 😅

ما علينا

أتمنى أن هالتدوينة تنال على اعجابكم

ويالله نبدأ ..

كالعادة قبل لا نبدأ خلونا نجهز مشروب جميل عشان نستمتع بالقراءة

لأنه رح استرسل بالكتابة شوي و إن شاءلله ما تملون من ثرثتي

هالتدوينة هي سلسلة من مجموعة تدوينات أتكلم فيها عن أهم خمس

أشياء صارت لي في الشهر ..

يعني حاليًا رح أتكلم عن شهر مارش أو مارس..

الصراحة بهذا الشهر ما صارت احداث كثير وكان جدا جدا أحداثه مكرره مثل ما أنتوا عارفين بسبب الحجر

الكلي بمدينتي الجميلة أصبح صعب الواحد يروح لأي مكان حتى أهلي ..

أول شي بهالشهر صار وتقريبًا هو أهم شي صار بالنسبة لي وهو

افتتاح موقع

Glamorous Seasons

هالموقع اشتغلت فيه تقريبا سنتين .. ليه أخذ مني كل هالوقت ؟!!!

أولا لأني اشتغلته بروحي وبحكم أني أم فل تايم فالوقت اللي يا دوب أحصله اشتغل فيه ..

وأدري أن كثير شغلات يبيلي اشتغل عليه ومو ذاك الاحترافي بس كبداية 

Not Bad 

صحيح مو بالشكل اللي اتمناه بس عشان لا نتأخر أكثر فوق ما أحنا متأخرين فقررنا نفتحه افتتاح تجريبي

وبعدين نسوي الإفتتاح الرسمي بالشكل اللي أبيه ..

هالموقع الجميل متخصص ببيع منتجات كورية مختصة بالعناية بالبشرة والتجميل  بأسعار جدا منافسة وبجودة عالية ..

دخلنا السوق عن طريق المدرسة التقليدية عن طريق محلات الجملة وكذا ..

وقررنا نطلق موقعنا حتى نوصل لأكبر شريحة ممكنة في المملكة كلها ..

خصوصًا المناطق اللي ما يتوفر عندهم محلات مثل المدن الرئيسية

ولأنكم عزيزين علي أكيد ما رح أنساكم والأكيد رح أعطيكم كود خاص لكم تقدروا تستخدمونه

يعطيكم خصم خاص .. ♥️

كيفني وأنا اضبكم بس

😘♥️

كود الخصم :

OnlyDalya%

** ** ** 

الخبز

Baking

من أكثر الأشياء اللي احبها وأكرهها هو الخبز ..

وأنا أخبز أحس براحة مدري ليه بس أكثر شي أكرهه وقت جلي الصحون هنا الحوسة ..

المهم ما علينا مع الأوضاع الحالية مافي ترفيه غير أني أخبز وأسوي أشياء يحبها يوسف ورهف ومحمد

طبعًا وأنا ..

بحكم أنه الحجر الفترة الأخيرة كان كلي ٢٤ ساعة فمو كل المحلات تفتح فإذا اشتهينا حاجة غالبًا اسويها بنفسي

يعني .. الفترة هذه أطول فترة في حياتي قضيتها في المطبخ عمري ما قد قضيت كل هالوقت بالمطبخ

لكن شنقول .. الحمدلله على الصحة والعافية والباقي كله يهون ..

بصراحة مافي شي محدد أحب أجرب كل شي في الخبر 

بس بصراحة احس أني للأن ما ضبطت الكوكيز ولو أني أحسه اسهل شي

هو الشيء الوحيد اللي ما ضبطته .. 

واللي حبيته وكررته أكثر من مرة هو الأيسكريم حبيته حيل .. خصوصا مع الإَضافات .. 

بس لا تحسبوا أني فنانة وكذا لا بس سعادة لم أسوي شي ويضبط ..

وإذا ودكم بالطريقة اضغطوا على الصورة بتحولكم على رابط الفيديو ..وفيه ذاكرة الطريقة والمكونات

وبما أنى أصبحت من عشاق الخبز وأنا أصلا أعشق التصوير خصوصا اليوميات وكذا

فقررت أنعش قناتي وابدأ انتظم مثل قبل خصوصا أن عدد المشاهدات عندي مرة صار قليل بسبب عدم

انتظامي في تنزيل الفلوقات فقررت أني ابدأ اصور يومياتي وأنزلها مرة في الأسبوع كالعادة

صحيح ضغط لكن هالشي كثير أحبه واستانس حيل يوم اقرأ التعليقات وأرد عليها أحس وقتها  بتواصل حقيقي مع الناس ..

** ** **

وقت العيلة

Family time

كل يوم يعدي يوسف حبيبي قلبي قاعد يكبر قدامي وألاحظ تطورات كثير في تصرفاته وكلامه واصبحنا متعلقين ببعض

طبعًا رهف تغير كثير من يوسف وياحبيب القلب يسوفي قلبه كبير يوم يشوف أخته تغيير يقوم ويقولها هافا توتو هنا

مدري ليه ما يضبط كثير نطق حرف الراء ولاحظت بعد حرف الفاء ينطقه ڤاء ..

آه بس ماشاءلله عليه بس أسمعها منه وهو يقول هافا قلبي يذوب .. وأحيان اتعني اخليه يقول أي كلمه ينطق فيها حرف الفاء عشان أسمعه يقول مثلا ماڤي لا ڤي وكذا ..

ومن الأوقات الجميلة اللي نقضيها سوا لم نخبز هو كثير ينبسط ويتفاعل ..

حتى رهف بس الفترة هذه مع الضغوطات سرت اشغلها بالفيلم المفضل حقها موانا

 يا دوب اركز مع واحد ..

** ** **

وقتي الخاص

Me Time

مع الحجر المنزلي توقعت أن بيكون عندي وقت طويل خاص فيني وأقدر انجز واسوي كل اللي براسي

ولكن الحقيقة والواقع هالشي خلاني أنشغل أكثر وأنكرف كرف الله لا يوريكم بس ..

حسبي الله على الصيني اللي أكل خفاش ..

أصبحت هيئة الترفيه في البيت ..

والأهم أننا بصحة وعافية والحمدلله

** ** **

نتفلكس

NetFlix

مسلسل أمريكي قصته بإختصار واحد سايكوا بس ما يبين أنه سايكوا إلا بعد كم حلقة و

الأعصاب مشدودة طول الوقت مرة يوتر بس يحمس بنفس الوقت

نصيحة خذوا بريك بين كل سيزن والثاني وبين كل حلقتين بريك لا تسوا مثلي أحس أن أخلاقي صارت تجاريه

YOU ..

من كثر الحماس اللي فيني قللت وقت نومي وصرت بس اتفرج الحلقات مثل المجنونة حبيته حيل

الحبكة الدرامية جميلة بس مع تقدم الحلقات بصراحة عرفت انه سايكوا ..

في لحظات حسيت بالطفش وكرهت مقتطفات القتل مدري ما أحب أشوف أي شي فيه قتل وعنف ..

** **

وبكذا وصلنا لنهاية تدوينة شهر مارش أو مارس وأتمنى انكم استمتعوا

وبليز شاركوني أفلامكم ومسلسلاتكم اللي تحبوا تتفرجوها على نتلفكس ..